കൊല്ലം: പ്രാർത്ഥനയിലൂടെ രോഗശാന്തി നൽകാമെന്നും മുത്തശ്ശിയുടെ ബാധ ഒഴിപ്പിക്കാമെന്നും വിശ്വസിപ്പിച്ച് പതിനാറുകാരിയെ പലതവണ ലൈംഗികമായി പീഡിപ്പിച്ചെന്ന പരാതിയിൽ മതപ്രഭാഷകനും യൂട്യൂബറുമായ മുഹമ്മദ് നിയാസ് ജൗഹരി (34) അറസ്റ്റിൽ. കൊല്ലം ഓച്ചിറയിലെ ഹബീബിയ്യ ഇസ്‌ലാമിക് അക്കാദമിയുടെ ഡയറക്ടറായ ഇയാളെ നവംബർ ഒന്നിനാണ് പൊലീസ് അറസ്റ്റ് ചെയ്തത്. പ്രതിയെ ജുഡീഷ്യൽ കസ്റ്റഡിയിൽ വിട്ടു.പെൺകുട്ടിയുടെ മുത്തശ്ശിക്ക് ആരോഗ്യപ്രശ്നങ്ങളുണ്ടായിരുന്നുവെന്നും പ്രാർത്ഥനയിലൂടെ പരിഹാരം കാണാമെന്ന് പറഞ്ഞ് കുടുംബത്തിന്റെ വിശ്വാസം നേടിയെടുത്തെന്നുമാണ് പൊലീസ് അന്വേഷണത്തിൽ പുറത്തുവന്ന വിവരം. മുത്തശ്ശിയുടെ ശരീരത്തിൽ ബാധയുണ്ടെന്നും അത് ഒഴിപ്പിക്കണമെന്നും വിശ്വസിപ്പിച്ച് പെൺകുട്ടിയെയും മുത്തശ്ശിയെയും പ്രതി സമീപിച്ചെന്നാണ് റിപ്പോർട്ടുകൾ.
തുടർന്ന് വിവിധ സ്ഥലങ്ങളിൽ വെച്ച് പെൺകുട്ടിയെ ലൈംഗികമായി പീഡിപ്പിച്ചെന്നാണ് പരാതി. 2025 ഒക്ടോബർ മുതൽ പല ഘട്ടങ്ങളിലായി അതിക്രമം നടന്നതായാണ് മാധ്യമങ്ങൾ റിപ്പോർട്ട് ചെയ്യുന്നത്. പെൺകുട്ടി നേരിട്ട ദുരനുഭവം സുഹൃത്തുക്കളോട് പങ്കുവെച്ചതോടെയാണ് സംഭവം പുറത്തറിയുന്നത്. തുടർന്ന് പൊലീസിൽ പരാതി നൽകുകയായിരുന്നു.പെൺകുട്ടിയുടെ മൊഴി, മെഡിക്കൽ പരിശോധനയുമായി ബന്ധപ്പെട്ട വിവരങ്ങൾ, മൊബൈൽ ഫോൺ സംഭാഷണങ്ങൾ എന്നിവ പരിശോധിച്ച ശേഷമാണ് അറസ്റ്റ് നടപടികളിലേക്ക് കടന്നതെന്നാണ് റിപ്പോർട്ടുകൾ. പ്രതിയുടേതെന്ന് പറയുന്ന ശബ്ദസന്ദേശങ്ങളും പുറത്തുവന്നിട്ടുണ്ട്. നടന്ന കാര്യങ്ങൾ ആരോടും പറയരുതെന്ന് പെൺകുട്ടിയോട് ആവശ്യപ്പെടുന്ന സന്ദേശങ്ങളുണ്ടെന്നാണ് മാധ്യമം റിപ്പോർട്ട് ചെയ്യുന്നത്.
സംഭവത്തെ തുടർന്ന് പ്രതി ഡയറക്ടറായിരുന്ന ഓച്ചിറ മേമനയിലെ ഹബീബിയ്യ ഇസ്‌ലാമിക് അക്കാദമി അധികൃതർ താൽക്കാലികമായി അടപ്പിച്ചു. സ്ഥാപനത്തിൽ നാൽപതോളം വിദ്യാർഥികൾ താമസിച്ചു പഠിച്ചിരുന്നതായാണ് റിപ്പോർട്ട്. കുട്ടികൾക്ക് ആവശ്യമായ കൗൺസിലിങ് നൽകാനും നടപടി സ്വീകരിച്ചിട്ടുണ്ട്.സ്ഥാപനത്തിന്റെ സാമ്പത്തിക ഇടപാടുകൾ, ഭൂമി വാങ്ങൽ എന്നിവയും പൊലീസ് പരിശോധിക്കുന്നുണ്ട്. പ്രതിയുടെ മൊബൈൽ ഫോണുകളും മറ്റ് ഇലക്ട്രോണിക് ഉപകരണങ്ങളും പരിശോധിച്ച് കൂടുതൽ പെൺകുട്ടികൾ സമാനമായ ചൂഷണത്തിന് ഇരയായിട്ടുണ്ടോയെന്ന് കണ്ടെത്താനാണ് അന്വേഷണ സംഘത്തിന്റെ ശ്രമം.വിശ്വാസത്തിന്റെ മറവിൽ കുട്ടികളെ ചൂഷണം ചെയ്യാൻ കഴിയുന്ന സാഹചര്യം എങ്ങനെ ഉണ്ടാകുന്നു?
രോഗശാന്തി, ബാധ ഒഴിപ്പിക്കൽ, ആത്മീയ പരിഹാരം തുടങ്ങിയ വാഗ്ദാനങ്ങളിലൂടെ കുടുംബങ്ങളുടെ വിശ്വാസം നേടിയെടുക്കുന്നവരുടെ പ്രവർത്തനങ്ങൾ എത്രത്തോളം നിരീക്ഷിക്കപ്പെടുന്നുണ്ട് എന്ന ചോദ്യവും ഈ സംഭവം ഉയർത്തുന്നു. കുട്ടികളുടെ സുരക്ഷ ഉറപ്പാക്കേണ്ട കുടുംബങ്ങളും വിദ്യാഭ്യാസ സ്ഥാപനങ്ങളും സാമൂഹിക സംവിധാനങ്ങളും ഇത്തരം സാഹചര്യങ്ങളിൽ കൂടുതൽ ജാഗ്രത പുലർത്തേണ്ടതിന്റെ ആവശ്യകതയും സംഭവം ചൂണ്ടിക്കാട്ടുന്നു.
കേസിൽ കൂടുതൽ ഇരകളുണ്ടോയെന്ന അന്വേഷണവും സ്ഥാപനവുമായി ബന്ധപ്പെട്ട പരിശോധനകളും തുടരുകയാണ്.
RETINA MEDIA | CRIME REPORT